Bakı Apellyasiya Məhkəməsində "Sharks" Məhdud Məsuliyyətli Cəmiyyətinin (MMC) ANS Yayım və Media Şirkətinə qarşı verdiyi apellyasiya şikayəti üzrə məhkəməsi başa çatıb.
Hakim Elmira Nağıyevanın sədrliyi ilə keçirilən prosesdə qərar elan olunub.
Qərara əsasən, şirkətin apellyasiya şikayəti təmin edilməyib. Birinci instansiya məhkəməsinin çıxardığı qərardad dəyişdirilmədən saxlanılıb.
Qeyd edək ki, ANS-lə "Sharks" şirkəti arasında 2013-cü ilin 27 avqust tarixində ilk müqavilə bağlanıb. ANS 2 saylı Bakı İnzibati-İqtisadi Məhkəməsinə mürciət edərək, sponsorluq haqqında müqaviləyə əsasən borcun tutulması iddiasını irəli sürüb.
Prosesdə ANS-in hüquqi nümayəndəsi iddia edib ki, "Sharks" şirkəti onlara yalnız 2 müqavilənin pulunu ödəyib:
"ANS-lə "Sharks" şirkəti arasında 2013-cü ildə 14 müqavilə imzalanıb. Müqaviləyə əsasən, ANS "Sharks" MMC-nin reklam məsullarını efirdə yerləşdirib. Həmin reklam çarxlarının qarşılığında şirkət ANS-ə yalnız 2 müqavilənin pulunu ödəyib. Onlar ANS-ə hissə-hissə - 1279, 3900, 700 və 2036 manat vəsait ödəsə də, qalan pullar ödənilməyib. Biz "Sharks" şirkətinin qalan 34 900 manat pulu ödəməsini istəyirik".
"Sharks" şirkətinin nümayəndəsi isə qarşı tərəfin iddiasını qəbul etməyib və MMC-nin ANS-ə borclu olmadıqlarını bildirib: "Bu iddianı qəbul etmirik. Çünki hər iki şirkət arasında müqavilə bağlanan zaman "Sharks"ın rəhbəri Səadət Bağırovanın həm imzası, həm də şirkətin möhürü olmayıb. Müqavilədəki imza şirkət nümayəndəsi Rahilə Tağıyevanın imzasıdır".
Daha sonra Sharks MMC aidiyyət barədə vəsatət qaldırıb. Lakin məhkəmə vəsatəti təmin etməyərək qərardad çıxarıb. Şirkət həmin qərardaddan apellyasiya şikayəti verib. (Report)
