"Oğlum 20 növ səhər yeməyini bəyənmirdi. İndi anbarda çaydan tapanda xəzinə tapmış kimi sevinirəm". 

"Unikal" xəbər verir ki, bunu Kahramanmaraşda 11 vilayətdə baş verən zəlzələlərdə bütün var-dövlətini itirən iş adamı Mehmet Bulanık "CNN Türk"ə müsahibəsində deyib.  

Zəlzələlərdən sonra 23 market və 8 evi dağılan iş adamı hazırda acınacaqlı vəziyyətdə yaşadıqlarını dilə gətirib:

"Allah yaxşı günü yaşadırsa, pisini də yaşadacaq. Süfrəyə 20 növ yemək qoyurduq.  Oğlum bəyənmirdi. Ortancıl oğlum isə “yeməyə heç nə tapmıram” deyib, masadan qalxırdı. İndi anbarda yaşayırıq. Çaydan axtardım. Qapağı olmayan çaydan tapanda bir xəzinə tapdığımı düşündüm, çox sevindim. Əsas odur ki, bütün bunları başa düşdüm və hamısından dərs aldım". 

Hatayın ən zəngin adamlarından biri olan Mehmet sözlərini belə davam etdirdi: "Hataydan ayrılmadıq. İşimizə davam etmək istəyirik. 400-ə yaxın işçimiz var. Bəziləri dünyasını dəyişdi, bəziləri getdi. Sevindiyim odur ki, işçilərim mənə “qardaş" deyib zəng vurur. Gəlin, kömək edin, ayağa qalxaq.  Biz iş adamları işləsək, vətəndaşlar da bizimlə işləyəcək. İqtisadiyyat inkişaf etdikcə şəhər də inkişaf edir. Bizim işləməyimiz üçün dövlətimiz arxamızda dağ kimi dayanmalı, banklar bizi tək qoymamalıdır".

Gülayə Mecid