“Xorvatiya ilə oyundan bir neçə gün keçdikdən sonra futbolçuların göstəricilərini soyuqbaşla təhlil etmək olar. Zaqrebdən yaxşı nəticə ilə qayıtmağımız mümkün idi. Bizi bu sensasiyadan cəmi 10 dəqiqə ayırdı”. 


Unikal.org xəbər verir ki, bu sözləri futbol üzrə Azərbaycan milli komandasının baş məşqçisi Nikola Yurçeviç Litva yığmasına qarşı martın 25-də keçiriləcək yoldaşlıq oyunundan öncə təşkil olunmuş mətbuat konfransında söyləyib.

Nikola Yurçeviçin sözlərinə görə, komandamız Xorvatiyaya qarşı yaxşı futbol oynadı. 
Sabahkı oyuna gəldikdə isə baş məşqçi deyib ki, rəsmi görüş olmasa da, komandamız qələbə qazanmaq üçün mübarizə aparacaq.
"Futbolçular oyuna yaxşı motivasiya olublar. Hər kəs meydana çıxmağa, oynamağa can atır. Bu görüşdə Xorvatiya ilə qarşılaşmada şans vermədiyim futbolçulara da özlərini göstərmək imkanı yaradacağıq. Bu dəyişiklik kiminsə oyunundan narazı qaldığımıza görə edilməyəcək. Sadəcə, digər futbolçulara da şans vermək istəyirik. Amma kimləri meydana buraxıb-buraxmayacağımızı bugünkü məşqdən sonra müəyyənləşdirəcəyik. Bakıya döndükdən sonra ağır məşqlər keçməmişik. Daha çox bərpa məşqləri etsək də, futbolçularla mütəmadi söhbətlər aparmışıq. Yenə deyirəm, hamı meydana çıxmağa, özünü ən yaxşı tərəfdən göstərməyə çalışır. Razıyam, Litva Xorvatiya deyil, amma hörmət ediləsi rəqibdir. Təbii ki, hücumda oynamağa çalışacağıq. Ancaq bu, rəqibdən də asılıdır. Rəqib imkan verdiyi qədər oynamaq mümkündür. Onu da qeyd edim ki, bu cür oyunlar komandanı daha yaxından tanımaq baxımından çox vacibdir”.
Qeyd edək ki, Azərbaycan – Litva görüşü sabah saat 18:00-da "Bakcell Arena" stadionunda keçiriləcək.