Futbol üzrə Azərbaycan milli komandası 2017-ci ildə ilk yoxlama matçını keçirib.

Unikal.org-un "Report" -a istinadən məlumatına görə, Robert Prosineçkinin baş məşqçilik etdiyi kollektiv Qətər yığmasının qonağı olub.

Doha şəhərində "Əl-Sədd" stadionunda baş tutmuş görüş Azərbaycan yığmasının qələbəsi ilə yekunlaşıb - 2:1. Hər 3 qol fasilədən sonra vurulub. 53-cü dəqiqədə Tərlan Quliyev hesabı açıb. Bundan 3 dəqiqə sonra meydan sahibləri bərabərlik qolunu vurub. Lakin 63-cü dəqiqədə Araz Abdullayev oyunda son nöqtəni qoyub.

Görüş FİFA-nın oyunlar üçün rəsmi pəncərəsinə daxil edilmədiyindən, Azərbaycan yığmasının heyətində yalnız Premyer Liqa klublarında çıxış edən futbolçular yer alıb. Xarici komandaların şərəfini qoruyan Ramil Şeydayev, Dmitri Nazarov, Kamran Ağayev, Emin Mahmudov və Dəniz Yılmaz kimi oyunçuların xidmətindən yararlana bilməyən R.Prosineçki Qətərə 3 debütantla yollanıb. Bunlar "Qarabağın qapıçısı Şahrudin Məhəmmədəliyev, "İnterin müdafiəçisi Abbas Hüseynov və "Qəbələnin yarımmüdafiəçisi Tellur Mütəllimov olub. Onlardan Mütəllimov start heyətində yer alıb.

DÇ-2022-nin təşkilatçısı olan Qətərin yığma komandası ilə görüşü DÇ-2018-in seçmə mərhələsi üçün hazırlıq xarakteri daşıyıb. Çünki Azərbaycan millisi martın 26-da Tofiq Bəhramov adına Respublika stadionunda Almaniya yığması ilə qarşılaşacaq. Bu mənada Asiya təmsilçisi ilə yoldaşlıq matçını seçmə mərhələnin vacib oyunu ərəfəsində son sınaq adlandırmaq olar.

Azərbaycan milli komandası bunadək Qətər yığması ilə 1 dəfə - 2013-cü il mayın 29-da qarşılaşıb və 1:1 hesablı heç-heçə edib. Hazırda FİFA reytinqində Qətər 85-ci, Azərbaycan isə 89-cu sıradadır.

Yoldaşlıq oyunu

9 mart

20:00 Qətər - Azərbaycan 1:2

Qollar: Tərlan Quliyev, 52 (0:1), Rodriqo Tabata, 55 (1:1), Araz Abdullayev, 63 (1-2).

Doha. Şeyx Cassim ibn Hamad adına stadion