“Yoluxma sayı ilə sağalanların sayı demək olar eyniləşib. Ehtiyatla olsa da deyə bilərik ki, sabitləşmə var. Sağalanlarla yoluxanların sayı arasında kəskin fərq azalmağa doğru gedir”. 
 
Unikal.org xəbər verir ki, bunu Tibbi Ərazi Bölmələrini İdarəetmə Birliyinin (TƏBİB) Xəstəliklərin kontrolu və profilaktikası şöbəsinin müdiri Yaqut Qarayeva Nazirlər Kabineti yanında Operativ Qərargahın brifinqində deyib.

TƏBİB rəsmisi qeyd edib ki, bu da qoyulan qaydalara ciddi əməl edilməsi ilə əlaqəlidir:

“Bunu ictimai nəqliyyatda və marketlərdə də görürük. Xəstəliyin ağırlaşma dərəcəsinə inananlar da çoxalıb. Nə qədər həkimlər çalışsa da, qayda-qanun olsa da, əlbir olmasaq xəstəliyə qalib gəlmək olmaz”.